zarre zarre meñ mahak pyaar kī Daalī jaa.e
bū ta.assub kī har ik dil se nikālī jaa.e
apne dushman ko bhī ḳhud baḌh ke lagā lo siine
baat bigḌī huī is tarah banā lī jaa.e
aap ḳhush ho ke agar ham ko ijāzat de deñ
aap ke naam se ik bazm sajā lī jaa.e
ho ke majbūr ye bachchoñ ko sabaq denā hai
ab qalam chhoḌ ke talvār uThā lī jaa.e
soch kar arz-e-talab vaqt ke sultān se kar
māñgne vaale tirī baat na ḳhālī jaa.e