tū apne phuul se hoñToñ ko rā.egāñ mat kar
agar vafā kā irāda nahīñ to haañ mat kar
tū merī shaam kī palkoñ se raushnī mat chhīn
jahāñ charāġh jalā.e vahāñ dhuāñ mat kar
phir is ke ba.ad to āñkhoñ ko sañg honā hai
milī hai fursat-e-girya to rā.egāñ mat kar
chhalak rahā hai tire dil kā dard chehre se
chhupā chhupā ke mohabbat ko dāstāñ mat kar
tū jaate jaate na de mujh ko zindagī kī duā
maiñ jī sakūñgā tire ba.ad ye gumāñ mat kar