barsoñ ke rat-jagoñ kī thakan khā ga.ī mujhe
sūraj nikal rahā thā ki niiñd aa ga.ī mujhe
rakkhī na zindagī ne mirī muflisī kī sharm
chādar banā ke raah meñ phailā ga.ī mujhe
maiñ bik gayā thā baad meñ be-sarfa jaan kar
duniyā mirī dukān pe lauTā ga.ī mujhe
dariyā pe ek tanz samajhiye ki tishnagī
sāhil kī sard ret meñ dafnā ga.ī mujhe
ai zindagī tamām lahū rā.egāñ huā
kis dasht-e-be-savād meñ barsā ga.ī mujhe
kāġhaz kā chāñd rakh diyā duniyā ne haath meñ
pahle safar kī raat hī raas aa ga.ī mujhe
kyā chiiz thī kisī kī adā-e-supurdagī
bhīge badan kī aag meñ nahlā ga.ī mujhe
'qaisar' qalam kī aag kā ehsānmand huuñ
jab uñgliyāñ jalīñ to ġhazal aa ga.ī mujhe