apnī tanhā.ī kī palkoñ ko bhigo luuñ pahle
phir ġhazal tujh pe likhūñ baiTh ke ro luuñ pahle
ḳhvāb ke saath kahīñ kho na ga.ī ho āñkheñ
jab uThūñ so ke to chehre ko TaTolūñ pahle
mere ḳhvāboñ ko hai mausam pe bharosa kitnā
ba.ad meñ phuul khileñ haar piro luuñ pahle
dekhnā hai vo ḳhafā rahtā hai mujh se kab tak
maiñ ne sochā hai ki is baar na bolūñ pahle
dostoñ ne mujhe vo daaġh diye haiñ 'qaisar'
vo bhī aa jaa.eñ to darvāza na kholūñ pahle