badan pe zaḳhm sajā.e lahū labāda kiyā

har ek sañg se yuuñ ham ne istifāda kiyā

hai yuuñ ki kuchh to baġhāvat-sirisht ham bhī haiñ

sitam bhī us ne zarūrat se kuchh ziyāda kiyā

hameñ to maut bhī de koī kab gavārā thā

ye apnā qatl to bil-qasd bil-irāda kiyā

bas ek jaan bachī thī chhiḌak dī rāhoñ par

dil-e-ġharīb ne ik ehtimām saada kiyā

jo jis jagah ke thā qābil use vahīñ rakkhā

na ziyāda kam kiyā ham ne na kam ziyāda kiyā

bachā liyā hai jo sar apnā saḳht nādim haiñ

magar ye apnā tahaffuz to be-irāda kiyā

na lauTne kā hai rasta na Thaharne kī hai jā

kidhar kā aaj junūñ ne mire irāda kiyā