mujhe jis ne merā patā diyā vo ġham-e-nihāñ mire saath hai

mirī zindagī mirī raushnī dil‌-be-amāñ mire saath hai

mirā kārvāñ jo bichhaḌ gayā mire dil kā naqsh bigaḌ gayā

maiñ huuñ ik musāfir gum-shuda so yahī fuġhāñ mire saath hai

isī aarzū kī taḌap liye yūñhī phir rahā huuñ maiñ dar-ba-dar

vahī ḳhaak hai mire sar meñ bhī vahī āsmāñ mire saath hai

ye jo aañkh aaj chhalak uThī mire dil kā bhed hī khul gayā

maiñ samajh rahā thā ye ab talak ġham-e-be-nishāñ mire saath hai

jo ga.e dinoñ pe uThī nazar mire dil ne ḳhud ye kahā mujhe

maiñ kisī tilism-kade meñ huuñ koī dāstāñ mire saath hai

baḌī muddatoñ ke ba.ad jo ab tirī yaad aa.ī to yuuñ lagā

sar-e-dasht-e-vahshat zindagī koī mehrbāñ mire saath hai

yahī soch kar maiñ huuñ mutma.in tahī-dast phir bhī nahīñ huuñ maiñ

mire dost go ki chale ga.e ġham-e-dostāñ mire saath hai

kisī taal par kisī taan par mirī ruuh aaj hai vajd meñ

mirā vahm hai ki haqīqatan koī naġhma-ḳhvāñ mire saath hai

ye ajab rañg-e-mizāj hai magar ab yahī mujhe raas hai

kabhī DhūñDhtā huuñ maiñ ḳhud ko bhī kabhī ik jahāñ mire saath hai