har ghaḌī ik sitam ījād kiyā hai ham ne
shahr-e-dil ḳhud tujhe barbād kiyā hai ham ne
aaj is ke hī karishmoñ se haiñ mahjūb bahut
kal jise ḳhud hī parī-zād kiyā hai ham ne
ik imārat ki uThānī hai sar-e-dasht-e-vajūd
so ġham-e-jāñ tujhe buniyād kiyā hai ham ne
apne siine meñ utāre ka.ī ḳhanjar sau baar
tujh ko ik baar jo nāshād kiyā hai ham ne
kis qadar aaj havāoñ meñ laraztā rahā dil
kis qadar aaj tujhe yaad kiyā hai ham ne