fuzūl vaqt samajh ke guzār kar mujh ko
vo jā rahā hai kahīñ duur maar kar mujh ko
talāsh mujh ko hai us chāhatoñ kī devī kī
jo chhup ga.ī hai hamesha pukār kar mujh ko
tamām umr tire intizār meñ hamdam
ḳhizāñ-rasīda rahā huuñ bahār kar mujh ko
tirā ḳhulūs to chehre badaltā rahtā hai
ki ek pal ko hī apnā shumār kar mujh ko
'nadīm' us kā purānā libās huuñ shāyad
vo lag rahā hai bahut ḳhush utaar kar mujh ko