ḳhushbuoñ kā shajar nahīñ dekhā
ek muddat se ghar nahīñ dekhā
rahguzar ham ne aisī chun lī thī
mīloñ dīvār-o-dar nahīñ dekhā
tum jo badle to kyā ġhazab badle
ham ne aisā asar nahīñ dekhā
itnī bojhal huī thī ye palkeñ
us ko dekhā magar nahīñ dekhā
chāñd kaise zamīñ pe chaltā hai
jis ne us ko agar nahīñ dekhā
aa.ina ham se roz pūchhe hai
ḳhud ko kyuuñ ban-sañvar nahīñ dekhā
ḳhat ko chūmā usī kī ḳhushbū thī
ḳhat ke andar magar nahīñ dekhā
tum se bichhḌe to kaise zinda haiñ
tum ne ye soch kar nahīñ dekhā