ġhamgīñ haiñ dil-figār haiñ mere yahāñ ke log
dāmān-e-tār-tār haiñ mere yahāñ ke log
paidā kiyā hai jhūTe masīhāoñ ne jise
us dard ke shikār haiñ mere yahāñ ke log
kyā jāniye haiñ kab se jigar soḳhta magar
insāñ ke ġham-gusār haiñ mere yahāñ ke log
gardan agarche ḳham hai itā.at ke bojh se
lekin harīf-e-dār haiñ mere yahāñ ke log
'daurāñ' inhī ke zaḳhm se phūTegī raushnī
maanā ki sogvār haiñ mere yahāñ ke log