ujlī ujlī barf ke nīche patthar niilā niilā hai

terī yādoñ meñ ye sard december niilā niilā hai

din kī rañgat ḳhair guzar jaatī hai tere bin lekin

kattha.ī kattha.ī rātoñ kā har manzar niilā niilā hai

duur idhar khiḌkī par baiThī soch rahī ho mujh ko kyā

chāñd udhar chhat par aayā hai thak kar niilā niilā hai

terī niilī chunarī ne kyā haal kiyā bāġhīche kā

nārañgī phūloñ vaalā gul-mohar niilā niilā hai

bādal ke pīchhe kā sach ab kholā terī āñkhoñ ne

tū jo nihāre roz use to ambar niilā niilā hai

husn bhale ho raushan terā laal gulābī rañg liye

ishq kā tere partav lekin dil par niilā niilā hai

ik to tū bhī saath nahīñ hai uupar se ye bārish uf

ghar to ghar saarā kā saarā daftar niilā niilā hai