jo kahīñ thā hī nahīñ us ko kahīñ DhūñDhnā thā
ham ko ik vahm ke jañgal meñ yaqīñ DhūñDhnā thā
pahle ta.amīr hameñ karnā thā achchhā sā makāñ
phir makāñ ke liye achchhā sā makīñ DhūñDhnā thā
sab ke sab DhūñDte phirte the use ban ke hujūm
jis ko apne meñ kahīñ apne ta.iiñ DhūñDhnā thā
justujū kā ik ajab silsila tā-umr rahā
ḳhud ko khonā thā kahīñ aur kahīñ DhūñDhnā thā
niiñd ko DhūñD ke laane kī davā.eñ thiiñ bahut
kaam mushkil to koī ḳhvāb hasīñ DhūñDhnā thā
dil bhī bachche kī tarah zid pe aḌā thā apnā
jo jahāñ thā hī nahīñ us ko vahīñ DhūñDhnā thā
ham bhī jiine ke liye thoḌā sukūñ thoḌā sā chain
DhūñD sakte the magar ham ko nahīñ DhūñDhnā thā