ye kab chāhā ki maiñ mash.hūr ho jā.ūñ
bas apne aap ko manzūr ho jā.ūñ
nasīhat kar rahī hai aql kab se
ki maiñ dīvāngī se duur ho jā.ūñ
na bolūñ sach to kaisā ā.īna maiñ
jo bolūñ sach to chaknā-chūr ho jā.ūñ
hai mere haath meñ jab haath terā
ajab kyā hai jo maiñ maġhrūr ho jā.ūñ
bahāna koī to ai zindagī de
ki jiine ke liye majbūr ho jā.ūñ
sarāboñ se mujhe sairāb kar de
nashe meñ tishnagī ke chuur ho jā.ūñ
mire andar se gar duniyā nikal jaa.e
maiñ apne-āp meñ bharpūr ho jā.ūñ