hai koī bair sā us ko mirī tadbīr ke saath
ab kahāñ tak koī jhagḌā kare taqdīr ke saath
mire hone meñ na hone kā thā sāmāñ maujūd
TūTnā merā likhā thā mirī ta.amīr ke saath
chhoḌ jaate haiñ haqīqat ke jahāñ meñ hameñ phir
ḳhvāb aate hī kahāñ hameñ kabhī ta.abīr ke saath
aadmī hī ke banā.e hue zindāñ haiñ ye sab
koī paidā nahīñ hotā kisī zanjīr ke saath
jānte sab haiñ ki do gaz hī zamīñ apnī hai
kaun ḳhush rahtā hai lekin kisī jāgīr ke saath
saath 'ġhālib' ke ga.ī fikr kī gahrā.ī bhī
aur lahja bhī gayā 'mīr-taqī-mīr' ke saath