darvāze ke andar ik darvāza aur
chhupā huā hai mujh meñ jaane kyā kyā aur
koī ant nahīñ man ke sūne-pan kā
sannāTe ke paar hai ik sannāTā aur
kabhī to lagtā hai jitnā hai kaafī hai
aur kabhī lagtā hai aur zarā sā aur
sach kahne par ḳhush honā to duur rahā
kiyā zamāne ne mujh ko sharminda aur
ajab musāfir huuñ maiñ merā safar ajiib
merī manzil aur hai merā rasta aur
auroñ jaise aur na jaane kitne haiñ
koī kahāñ hai lekin mere jaisā aur