zindagī tū ne lahū le ke diyā kuchh bhī nahīñ
tere dāman meñ mire vāste kyā kuchh bhī nahīñ
aap in hāthoñ kī chāheñ to talāshī le leñ
mere hāthoñ meñ lakīroñ ke sivā kuchh bhī nahīñ
ham ne dekhā hai ka.ī aise ḳhudāoñ ko yahāñ
sāmne jin ke vo sach-much kā ḳhudā kuchh bhī nahīñ
yā ḳhudā ab ke ye kis rañg meñ aa.ī hai bahār
zard hī zard hai peḌoñ pe harā kuchh bhī nahīñ
dil bhī ik zid pe aḌā hai kisī bachche kī tarah
yā to sab kuchh hī ise chāhiye yā kuchh bhī nahīñ