mar ga.e haiñ jo hijr-e-yār meñ ham

saḳht betāb haiñ mazār meñ ham

tā dil-e-kīna-var meñ paa.eñ jagah

ḳhaak ho kar mile ġhubār meñ ham

vo to sau baar iḳhtiyār meñ aa.e

par nahīñ apne iḳhtiyār meñ ham

kab hue ḳhār-e-rāh-e-ġhair bhalā

kyuuñ khaTakte haiñ chashm-e-yār meñ ham

kū-e-dushman meñ ho ga.e pāmāl

āmad-o-raft-e-bār-bār meñ ham

naash par to ḳhudā ke vāste aa

mar ga.e tere intizār meñ ham

gar nahīñ 'sheftā' ḳhayāl-e-firāq

kyuuñ taḌapte haiñ vasl-e-yār meñ ham