dosto ke kaam aanā jurm hai

ḳhud ko dariyā-dil banānā jurm hai

ashk-rezī kī ijāzat hai magar

ehtijājan muskurānā jurm hai

munharif tārīkiyoñ ke saaz par

koī raushan giit gaanā jurm hai

jab numā.ish kī chamak ho nā-guzīr

apnī raunaq bhuul jaanā jurm hai

sar jhukānā achchhī aadat hai magar

tañg aa kar sar uThānā jurm hai

pattharoñ ke baaġh meñ sājid-'asar'

kāñch ke paude lagānā jurm hai