maut aa.ī mujhe kūche meñ tire jaane se
niiñd aa hī ga.ī jannat kī havā khāne se
huuñ vo āshiq ki tah-e-qabr maiñ jal jaatā huuñ
sham.a turbat par agar miltī hai parvāne se
qasd uThne kā qayāmat ne kiyā to ye kahā
lo ye sar chaḌhne lagī paañv ke Thukrāne se
vasl kī shab na kar itnā bhī hijāb ai zālim
shoḳhiyāñ tañg haiñ terī tire sharmāne se
koī hañs hañs ke sune aur maiñ ro ro ke kahūñ
lutf donoñ ko mile dard ke afsāne se
ġhuncha chaTkā koī gulshan meñ to lailā samjhī
mere majnūñ ne pukārā mujhe vīrāne se
rahe rañj o alam o vahshat o barbādī o yaas
ai junūñ koī na jaa.e mire vīrāne se
kis ko fursat thī par is tarah meñ kuchh sher 'vasīm'
kah liye hazrat-e-'naushād' ke farmāne se