bhar diiñ shabāb ne ye un āñkhoñ meñ shoḳhiyāñ
til bhar bhī ab jagah nahīñ un meñ hayā kī hai
pheñk aa.e us ko jā ke vo kū-e-raqīb meñ
miTTī ḳharāb mere dil-e-mubtalā kī hai
detā huuñ dil ḳhushī se mirī jaan chhoḌiye
is ko na lījiye ye amānat ḳhudā kī hai
tauba na muñh lagā.egī rindoñ ko duḳht-e-raz
qālib meñ us ke ruuh kisī pārsā kī hai
tere hinā.ī haath tak un ko hai dastaras
ai rashk-e-gul chaman meñ ye qismat hinā kī hai
lākhoñ shahīd-e-nāz ga.e haiñ jahān se
mulk-e-adam meñ dhuum tumhārī jafā kī hai
choTī ke sher tū ne kahe is zamīn meñ
sach hai 'vasīm' terī tabī.at balā kī hai