dil lagāne kī bhuul the pahle
ab jo patthar haiñ phuul the pahle
muddatoñ ba.ad vo huā qaa.el
ham use kab qubūl the pahle
us se mil kar hue haiñ kār-āmad
chāñd taare fuzūl the pahle
log girte nahīñ the nazroñ se
ishq ke kuchh usuul the pahle
ann-dātā haiñ ab gulāboñ ke
jitne sūkhe babūl the pahle
aaj kāñTe haiñ un kī shāḳhoñ par
jin daraḳhtoñ pe phuul the pahle
daur-e-hāzir kī ye ināyat hai
ham na itne malūl the pahle
jhūThe ilzām maan lete haiñ
ham bhī shāyad rasūl the pahle
jin ke nāmoñ pe aaj raste haiñ
vahī rastoñ kī dhuul the pahle