na payām chāhte haiñ na kalām chāhte haiñ

mirī raat ke añdhere tirā naam chāhte haiñ

jo jigar ko ḳhaak kar de jo dimāġh phūñk Daale

mire pyāse hoñT aisā koī jaam chāhte haiñ

vo ho shuġhl-e-bāda-noshī ki tavāf-e-kū-e-jānāñ

ġham-e-zindagī ke maare koī kaam chāhte haiñ

hameñ miT ke bhī ye hasrat ki bhaTakte us galī meñ

vo haiñ kaise log yā rab jo qayām chāhte haiñ

tirī yaad terī aahaT tirā chehrā terā vaada

koī sham.a ho magar ham sar-e-shām chāhte haiñ

ham isī liye haiñ 'arshad' abhī tishna-masarrat

ki jo un laboñ se chhalke vahī jaam chāhte haiñ