qatre ko tum dariyā kar do
mujh ko apne jaisā kar do
dil meñ apnā pyaar jagā kar
kaash mohabbat vaalā kar do
mujh ko apnā kah kar sab se
mere pīchhe duniyā kar do
aisī āñdhī pyaar kī bhejo
dil kā gulshan sahrā kar do
tere sivā maiñ kuchh bhī na dekhūñ
aañkh pe aisā pardā kar do
dhaḌkan aa.heñ sab haiñ suunī
sāñsoñ ko bhī tanhā kar do
mahfil mahfil dekh chuke haiñ
jaan meñ aa kar jalva kar do
rukne lagī hai dil kī dhaḌkan
jī chāhe to achchhā kar do
apne 'ziyā' ke saath raho tum
mar jaa.e to zinda kar do