kisī ko kuchh nahīñ miltā hai aarzū ke baġhair

magar ye kaun milā mujh ko justujū ke baġhair

ajiib tarz-e-mulāqāt thā sar-e-mahfil

payām saare mile mujh ko guftugū ke baġhair

mire jigar kā lahū hai vafāoñ kā zāmin

hinā bhī us kī adhūrī hai is lahū ke baġhair

ḳhumār o kaif meñ āñkheñ haiñ mai-kade jaisī

nashe meñ chuur huuñ maiñ bhī kisī subū ke baġhair

havā ne ḳhaar se mil kar ḳharāsheñ Dālīñ par

qabā-e-gul to mahaktī rahī rafū ke baġhair

hamāre zikr pe hañgāma ho gayā akasr

liyā hai naam kahāñ us ne hāv-hū ke baġhair

fazā udaas hai is vāste 'ziyā'-sāhib

bahār kaise chale mere māh-rū ke baġhair