us ko dekhā to dikhā kuchh bhī nahīñ
luT gayā sab kuchh bachā kuchh bhī nahīñ
soch kar na.ara lagāyā ishq ne
vo milā hai to gayā kuchh bhī nahīñ
ishq zinda yaar zindābād hai
is se aage kā patā kuchh bhī nahīñ
sach batā.ūñ dard bhī sauġhāt hai
varna aahoñ ko milā kuchh bhī nahīñ
ham ko pāgal kah rahā hai ye jahāñ
is ko lagtā hai huā kuchh bhī nahīñ
apnī mahfil meñ akelā thā vahī
saarī mahfil meñ dikhā kuchh bhī nahīñ
ishq kī itnī haqīqat hai 'ziyā'
us kī marzī ke sivā kuchh bhī nahīñ