mujhe to mohabbat se inkār hogā
magar dil ye raste kī dīvār hogā
huā hai mujhe ishq to ro rahā huuñ
maiñ hī kah rahā thā mazedār hogā
mohabbat ke dariyā meñ sab Dūbte haiñ
na tū paar hogā na vo paar hogā
tū ḳhud saath merā na de paayā ai dil
zamāna kahāñ tak vafādār hogā
giraftār zulfoñ meñ tum jo karo to
gunahgār dil merā sau baar hogā
jahāñ ġham ke badle meñ miltī hoñ ḳhushiyāñ
kahīñ koī aisā bhī bāzār hogā
'ziyā' ye batā kyā karegā tū us din
ki jab jiinā kyā marnā dushvār hogā