hausla dil kā havādis meñ baḌhā rakkhā hai

sham.a ko maiñ ne havāoñ meñ jalā rakkhā hai

dekh ai husn-e-ḳhud-ārā mire dil kī vus.at

tere ġham ko ġham-e-daurāñ se judā rakkhā hai

maiñ talātum meñ bhī sāhil kī ḳhabar rakhtā huuñ

maiñ ne har mauj ko sāhil se milā rakkhā hai

ik tire naam se rishta ho bas itnī sī hai baat

varna is sub.ha-o-zunnār meñ kyā rakkhā hai

ab maiñ ik jalva-e-be-rañg kā shaidā.ī huuñ

har charāġh-e-haram-o-dair bujhā rakkhā hai

sarguzisht-e-dil-e-betāb sunā dī lekin

ġham-gusāroñ se tirā naam chhupā rakkhā hai