tumhāre jaate hī har chashm-e-tar ko dekhte haiñ

hai āñsuoñ kā samundar jidhar ko dekhte haiñ

'farāz' ho ga.e ruḳhsat jahān-e-fānī se

udaas udaas suḳhan ke safar ko dekhte haiñ

kahāñ vo ishq-e-javāñ kī Thahar ga.iiñ kirneñ

rukī rukī huī bād-e-sahar ko dekhte haiñ

sunā hai 'faiz' se aage nikal ga.e the 'farāz'

ġhazal ke soz-e-darūñ ke asar ko dekhte haiñ

sunā hai us ne ġhazal kā badal diyā lahja

sabhī 'farāz' ke fikr-o-nazar ko dekhte haiñ

sunā hai us kī ġhazal aa.ina thī hastī kā

isī liye to ham us ā.īna-gar ko dekhte haiñ

sajāyā us ne hunar se jo apnī ġhazloñ ko

sunā hai log ab us ke hunar ko dekhte haiñ

kahāñ 'farāz' kahāñ 'āzam'-e-shikasta-jāñ

zarā sā chal ke ham us kī Dagar ko dekhte haiñ