mohabbat kā safar he aur maiñ huuñ
vo manzūr-e-nazar hai aur maiñ huuñ
parinda be-ruḳhī kā uḌ rahā hai
vafā kā ik shajar hai aur maiñ huuñ
qafas meñ le chalā sayyād mujh ko
ḳhayāl-e-bāl-o-par hai aur maiñ huuñ
safar āsān kitnā ho gayā hai
vo merā ham-safar hai aur maiñ huuñ
vahī āñgan vahī mehrāb-o-mimbar
vahī dīvār-o-dar hai aur maiñ huuñ
ab un kā ġham bhī apnā ġham hai 'rizvān'
udhar kā haal idhar hai aur maiñ huuñ