miTTī se kuchh ḳhvāb ugāne aayā huuñ
maiñ dhartī kā giit sunāne aayā huuñ
tū ne dariyāoñ meñ diye bahā.e haiñ
maiñ bhī apne hoñT jalāne aayā huuñ
tujh se merā rishta bahut purānā hai
maiñ duniyā meñ tere bahāne aayā huuñ
ab ke baar maiñ tujh se milne nahīñ aayā
tujh ko apne saath le jaane aayā huuñ
chaar diye terī dahlīz pe raushan haiñ
ek diyā maiñ aur jalāne aayā huuñ
tū ne teġh se lahū kī buuñd girā.ī thī
maiñ dhartī se phuul uThāne aayā huuñ