kyā sab us ne sun kar an-sunā kyā
vo ḳhud meñ is qadar thā mubtalā kyā
maiñ huuñ guzrā huā sā ek lamha
mire haq meñ duā kyā bad-duā kyā
kiran aa.ī kahāñ se raushnī kī
añdhere meñ koī jugnū jalā kyā
musāfir sab palaT kar aa rahe haiñ
vahāñ se band hai har rāsta kyā
maiñ ik muddat se ḳhud hī gum-shuda huuñ
batā.ūñ aap ko apnā patā kyā
ye mahfil do dhaḌoñ meñ baT ga.ī hai
zarā pūchho hai kis kā mudda.ā kyā
mohabbat rahguzar hai kahkashāñ sī
so is meñ ibtidā kyā intihā kyā