kabhī jo mil na sakī us ḳhushī kā hāsil hai

ye dard hī to mirī zindagī kā hāsil hai

maiñ apne aap se pīchhā nahīñ chhuḌā paayā

mirā vajūd mirī bebasī kā hāsil hai

ye tīrgī bhī kisī raushnī se niklī hai

ye raushnī bhī kisī tīrgī kā hāsil hai

hazār kāvisheñ kiiñ par nahīñ samajh paayā

koī batā.e to kyā aadmī kā hāsil hai

mirā vajūd jo patthar dikhā.ī detā hai

tamām umr kī shīshagarī kā hāsil hai

ma.āshre meñ jo mash.hūr ho gayā 'irfāñ'

vo ek sher tirī shā.irī kā hāsil hai