us ne jo ġham kiye havāle the
ham ne ik umr vo sambhāle the
sehn-e-dil meñ tumhāre sab va.ade
maiñ ne bachchoñ kī tarah paale the
aañkh se ḳhud-ba-ḳhud nikal aa.e
ashk ham ne kahāñ nikāle the
ik ḳhushī aise muskurā.ī thī
dard jaise bichhaḌne vaale the
apne hāthoñ se jo banā.e but
ek din saare toḌ Daale the
chār-sū vahshatoñ kā Derā thā
jaan ke har kisī ko laale the
ajnabī ban ke jo mile the 'amīn'
log sab mere dekhe-bhāle the