ga.e sab bhuul shikve dekh rū-e-yār kyā kahiye

zabāñ hairat se merī ho ga.ī be-kār kyā kahiye

tabassum meñ jo us kā muñh khulā dil bañdh gayā vohīñ

mirā dil le gayā hañste hī hañste yaar kyā kahiye

agar us kī jagah pahlū meñ hotā ḳhaar behtar thā

bahut detā hai merā dil mujhe āzār kyā kahiye

jalā kar āshiyāñ is fasl-e-gul meñ bāġhbāñ merā

jahannum tū ne mujh par kar diyā gulzār kyā kahiye

'yaqīñ' ke vāqiye kī sun ḳhabar vo bad-gumāñ bolā

ye dīvāna to kuchh aisā na thā bīmār kyā kahiye