muñh pe khātā hai ye is tarah se talvār ki bas
dil mirā ishq meñ aisā hai jigar-dār ki bas
naza.a meñ dekh mujhe yaar jhijak kar bolā
kyā burī tarah se martā hai ye bīmār ki bas
aap ko bech ke yūsuf ne zuleḳhā ko liyā
kyā ḳharīdār ne paayā hai ḳharīdār ki bas
is jhaḌī setī kahīñ gir na paḌe bām-e-falak
is tarah rote haiñ tujh bin dar-o-dīvār ki bas
ishq ke dār-e-shifā meñ mujhe le chal tū 'yaqīñ'
ki tabīboñ ne diyā is qadar āzār ki bas