dil ke jalte hue zaḳhmoñ kā mudāvā ban kar
phuul mahke haiñ tire haath kā saaya ban kar
maiñ tire jism ko chhūte hue yuuñ Dartā huuñ
tishnagī aur baḌhā degā tū dariyā ban kar
kyā Darā.eñge muqaddar ke añdhere tujh ko
maiñ chamaktā huuñ tire haath pe rekhā ban kar
vaqt hai barf kī dīvār to kaise pighle
ḳhuuñ bhī ā.ankhoñ se Tapaktā nahīñ sho.ala ban kar
haath aayā nahīñ kuchh sañg-e-malāmat ke sivā
shahr meñ dekh liyā ham ne tamāshā ban kar
hādsa koī ho bujhtī nahīñ ā.ankhoñ kī chamak
jism meñ phail gayā hai vo ujālā ban kar
aa.ine saaf the kis kis ko vahāñ jhuTlātā
har syāhī nazar aa.ī mirā chehra ban kar
tishnagī laakh sahī ghar se na niklo 'rāshid'
raat siine meñ utar jā.egī sahrā ban kar