har marhale se yuuñ to guzar jā.egī ye shaam

le kar balā-e-dard kidhar jā.egī ye shaam

phaileñgī chaar samt sunahrī udāsiyāñ

Takrā ke koh-e-shab se bikhar jā.egī ye shaam

rag rag meñ phail jā.egā tanhā.iyoñ kā zahr

chupke se mere dil meñ utar jā.egī ye shaam

TuuTā yaqīn zaḳhmī umīdeñ siyāh ḳhvāb

kyā le ke aaj sū-e-sahar jā.egī ye shaam

Thahregī ek lamhe ko ye gardish-e-hayāt

tham jā.egī ye sub.h Thahar jā.egī ye shaam

ḳhūnīñ bahut haiñ mamlikat-e-shab kī sarhadeñ

hāthoñ meñ le ke kāsa-e-sar jā.egī ye shaam

mahkegā lafz lafz se shāhid dayār-e-sub.h

le kar mirī ġhazal kā asar jā.egī ye shaam