kitne barse nagar nagar patthar
hausle kar na paa.e sar patthar
jo nishāñ-zad hue haiñ apne liye
vo to sab ā.eñge idhar patthar
baat kah dī thī ik ḳhudā-lagtī
merī samt aa.e kis qadar patthar
dekh mahñgī paḌegī man-mānī
bāñdhne hoñge peT par patthar
kis ne kīchaḌ meñ sañg maarā hai
paḌ ga.e kis kī fahm par patthar
soch ke kar kisī pe sañg-zanī
aa bhī sakte haiñ lauT kar patthar
sab pe hasrat kī ik nazar karke
ho ga.ī ek chashm-e-tar patthar
adl un kā 'na.īm' kyā kahnā
phuul apnī taraf idhar pathar