agar dushman kī thoḌī sī marammat aur ho jaatī

to phir ullū ke paThThe ko nasīhat aur ho jaatī

shab-e-va.ada maiñ un kī kam-sinī se Dar gayā varna

zarā sī baat par nāzil musībat aur ho jaatī

yahī achchhā huā tū ne jo zulfoñ ko muñDā Daalā

nahīñ to tere dīvānoñ kī hālat aur ho jaatī

agar tum nīm-uryāñ hashr ke maidāñ meñ aa jaate

qayāmat meñ phir ik barpā qayāmat aur ho jaatī

sharāb-e-nāb kī kartā mazammat phir na bhūle se

jo mai-ḳhāne meñ vaa.iz kī marammat aur ho jaatī

na un kī kam-sinī se maiñ sazā paatā adālat se

jo un ke āshnāoñ kī shahādat aur ho jaatī

lagā kartī hazāroñ āshiqoñ ko be-ḳhatā phāñsī

hasīnoñ kī agar ghar kī adālat aur ho jaatī

ḳhatā peshāb dushman kā huā ghar un ke piTne se

mazā jab thā ki saale ko ijābat aur ho jaatī

hameñ chāroñ taraf se gher rakkhā hai girānī ne

mire allāh ye duniyā se ġhārat aur ho jaatī

agar bosa diyā hai vasl kā va.ada bhī kar liije

ināyat kī to thoḌī sī ināyat aur ho jaatī

agar dil ko bachātā maiñ na zulfoñ ke aḌañge se

to duniyā bhar se lambī shām-e-furqat aur ho jaatī

duā hai 'būm' kī yārab ye cotton-mils kī bābat

taraqqī aur hotī zeb-o-zīnat aur ho jaatī