kuchh laag kuchh lagāv mohabbat meñ chāhiye
donoñ tarah kā rañg tabī.at meñ chāhiye
ye kyā ki but bane hue baiThe ho bazm meñ
kuchh be-takallufī bhī to ḳhalvat meñ chāhiye
vo ibtidā-e-ishq meñ hāsil huī mujhe
jo baat intihā-e-mohabbat meñ chāhiye
ā.eñge be-shumār farishte azaab ke
maidān-e-hashr ġhair kī turbat meñ chāhiye
kuchh to paḌe dabāo dil-e-be-qarār par
paarā bharā huā mirī turbat meñ chāhiye
māshūq ke kahe kā burā mānte ho 'dāġh'
bardāsht aadmī kī tabī.at meñ chāhiye