use dekh kar apnā mahbūb pyārā bahut yaad aayā
vo jugnū thā us se hameñ ik sitāra bahut yaad aayā
yahī shaam kā vaqt thā ghar se nikle ki yaad aa gayā thā
bahut din hue aaj vo sab dobāra bahut yaad aayā
sahar jab huī to bahut ḳhāmushī thī zamīñ shabnamī thī
kabhī ḳhāk-e-dil meñ thā koī sharāra bahut yaad aayā
baraste the bādal dhuāñ phailtā thā ajab chaar jānib
fazā khil uThī to sarāpā tumhārā bahut yaad aayā
kabhī us ke baare meñ sochā na thā aur sochā to dekho
samundar koī be-sadā be-kināra bahut yaad aayā