kabhī ham but kabhī nūr-e-sanam ko dekh lete haiñ

aqīde se baḌī dair-o-haram ko dekh lete haiñ

kabhī rote hue mujh ko nazar-andāz karte haiñ

kabhī āñkhoñ meñ vo halkī sī nam ko dekh lete haiñ

kabhī us muskurāhaT meñ kabhī us be-ruḳhī meñ ham

sitam ko dekh lete hai karam ko dekh lete haiñ

hameñ is vāste bhī ā.īne par pyaar aatā hai

ham apnī aañkh meñ apne balam ko dekh lete haiñ

bichhaḌ ke ho chuke barsoñ magar ḳhvāboñ ko hai taslīm

ham un ko dekh lete haiñ vo ham ko dekh lete haiñ