dūsrā kinārā bhī be-vafā kinārā hai
ab to Duub jaanā hī āḳhirī sahārā hai
maiñ utar nahīñ saktā dūsre kināre par
dūsrā kinārā to dūsrā kinārā hai
mujh pe ab mohabbat meñ zahr piinā vājib hai
maiñ ne dil nahīñ haarā hausla bhī haarā hai
ās.māñ kī vus.at meñ jaane ab kahāñ hogā
vo jo merī qismat kā be-ḳhabar sitārā hai
vaqt kī adālat kā faisla yahī hai ab
maiñ bhī ik ḳhasārā huuñ tū bhī ik ḳhasārā hai
dūsre kināre par ye ḳhabar huī mujh ko
vo to is kahānī meñ tīsrā kinārā hai
maiñ ne tere hisse ke ratjage bhī kaaTe haiñ
maiñ ne tere hisse kā qarz bhī utārā hai