sar pe sajne ko jo tayyār hai mere andar
gard-ālūd sī dastār hai mere andar
jis ke mar jaane kā ehsās banā rahtā hai
mujh se baḌh kar koī bīmār hai mere andar
roz ashkoñ kī na.ī fasl ugā detā hai
ek būḌhā sā zamīñdār hai mere andar
kitnā ghanghor añdherā hai mirī rag rag meñ
is qadar raushnī darkār hai mere andar
dab ke mar jā.ūñgā ik roz maiñ apne nīche
ek girtī huī dīvār hai mere andar
kaun detā hai ye har vaqt gavāhī merī
kaun ye merā taraf-dār hai mere andar
mere likkhe hue har lafz ko jhuTlātā hai
mujh se baḌh kar koī fankār hai mere andar