tire ehsās meñ Duubā huā maiñ

kabhī sahrā kabhī dariyā huā maiñ

tirī nazreñ Tikī thiiñ āsmāñ par

tire dāman se thā lipTā huā maiñ

khulī āñkhoñ se bhī soyā huuñ aksar

tumhārā rāsta taktā huā maiñ

ḳhudā jaane ke daldal meñ ġhamoñ ke

kahāñ tak jā.ūñgā dhañstā huā maiñ

bahut pur-ḳhār thī rāh-e-mohabbat

chalā aayā magar hañstā huā maiñ

ka.ī din baad us ne guftugū kī

ka.ī din ba.ad phir achchhā huā maiñ