ābla-pā.ī hai mahrūmī hai rusvā.ī hai
us but-e-nāz kā dil phir bhī tamannā.ī hai
merī āñkhoñ se Tapakte haiñ lahū ke aañsū
aaj be-laus mohabbat kī bhī rusvā.ī hai
lab pe phir naam vahī husn vahī āñkhoñ meñ
ai dil-e-zār yahī terī shakebā.ī hai
maz.haka-ḳhez hai andāz-e-takallum un kā
mai-e-ulfat magar āñkhoñ meñ utar aa.ī hai
'sānī'-e-zār tū ab aur karegī kyā kyā
āstāne pe musalsal to jabīñ-sā.ī hai