kyā ḳhuub ye anā hai ki kashkol toḌ kar
ab tak khaḌe hue haiñ vahīñ haath joḌ kar
mar hī na jaa.e zabt-e-fuġhāñ se kahīñ ye shahr
siine se is ke aah nikālo jhiñjhoḌ kar
sunnat hai koī hijrat-e-sānī bhalā batāo
jaatā hai koī apne madīne ko chhoḌ kar
is ke alāva koī hamārā nahīñ yahāñ
jaao koī ḳhudā ko bulā laao dauḌ kar
'āsim' ye dukh to jhelne paḌte haiñ ishq meñ
chādar na ho to sote nahīñ ḳhaak oḌh kar