ā.īnoñ se dhuul miTāne aate haiñ
kuchh mausam to aag lagāne aate haiñ
niiñd to goyā in āñkhoñ kī dushman hai
mujh ko phir bhī ḳhvāb suhāne aate haiñ
in āñkhoñ meñ rañg tumhāre khulte haiñ
ye mausam kab phuul khilāne aate haiñ
ronā hañsnā hañsnā ronā aadat hai
ham ko bhī kuchh dard chhupāne aate haiñ
shabnam shabnam ḳhvāb utarte haiñ mujh par
sau sau sūraj dhuup ugāne aate haiñ
jism dukāñ hai zehn bikā.ū shahroñ meñ
jañgal to do-chār divāne aate haiñ