dasht kī dhuup bhar gayā mujh meñ
merā saaya bikhar gayā mujh meñ
naam ho chāhe aks ho terā
ik jazīra ubhar gayā mujh meñ
paḌh sakā jo varaq varaq na mujhe
vo mukammal utar gayā mujh meñ
us ko guzre guzar ga.iiñ sadiyāñ
ek lamha Thahar gayā mujh meñ
kis ko DhūñDūñ kahāñ kahāñ DhūñDūñ
ḳhushbueñ kaun bhar gayā mujh meñ
qaid-e-tanhā.ī se nikāle vahī
jo mujhe qaid kar gayā mujh meñ
kis kā mātam kare 'salīm' koī
ajnabī thā jo mar gayā mujh meñ