aks hairān hai aa.ina kaun hai
vo hai ḳhushbū to phir phuul sā kaun hai
dil se nikle ho palkoñ pe dam lo zarā
ho musāfir tumheñ roktā kaun hai
ik samundar ne ḳhud ko jazīra kiyā
kyā huā kyuuñ huā pūchhtā kaun hai
ġhair-ābād hai vo galī vo makāñ
us darīche se phir jhāñktā kaun hai
zindagī hādse ke sivā kuchh nahīñ
hādse par magar sochtā kaun hai
zindagī meñ agar haiñ añdhere 'salīm'
terī ġhazloñ meñ phir chāñd sā kaun hai